BARRIKABASO. EHBilduren prentsa oharra Bizkaiko Foru Aldundian

Dakizuen moduan, Barrikabasoko hirigintza proiektuak oso egoera deserosoa eragin du Barrikan. Batetik, hainbat etxebizitza eraiki direlako legeak baimentzen ez zuen tokian eta esparru hori etxeak eraiki aurretik zegoen egoerara bueltatzeko eskatzen duelako Auzitegi Goreneko epai batek.
 

Barrikako EH Bildu arazo larri horri konponbidea emateko aritu da lanean. Afera honetako hiru aldeak ados jartzen saiatu da. Alegia, etxebizitzen jabeak, Txipio Bai eta Udala ados jarriko dituen akordioa bilatzen aritu gara. Horretarako Udala, Txipio Bai eta etxebizitzen jabeen arteko hitzarmena bultzatu dugu Udaletik, herriko alderdiek eta HAPO Aholkularitza Batzordeak horrela eskatuta.

Hiru aldeen arteko adostasunerako ardatzak topatzea lortu dugu guztion artean. Txipio Baik eraikita dauden etxebizitzak ez botatzea onartzen du baldin eta gainontzeko eremua urbanizatzea galarazten bada eta esparru hori lanak hasi aurretik zegoen bezala uzten bada.
 

Akordio hori ixteko zorian geundela, ordea, EAJk jarreraz aldatu du. Aldundiak esku hartu du auzian eta Barrikabasoko ingurua urbano bihurtu daitekeela zabaldu du etxebizitza jabeen artean. Aldi berean, Barrikako EAJk  Udaleko hirigintza batzordeko lehendakaritzatik kendu gaitu.
 

EAJren jarrerak ziurgabetasun juridikoan utziko luke Barrikabasoko auzia. Izan ere, ingurua urbanizatzen jarraitzen bada Txipio Bai eskubidea du Auzitegi Gorenak emandako sententzia exekutatu dadin eskatzeko. Eta orduan, irabaziz gero, eraikitako etxebizitza guztiak behera bota beharko lirateke. Horrek pleito eta auzibide prozesu bat ekarri lezake Barrikako Udalaren eta Aldundiaren kontra. Ondorioz, erakundeek kalte ordainak ordaindu behar izateko arriskua ere handia litzateke.
 

Beraz, EH Bilduren ustez, Barrikabasoko afera konpontzeko bide ziur bakarra aldeen arteko adostasuna bilatzea da. Horregatik, Udaleko hurrengo bilkurara proposamena aurkeztuko dugu, taldeek eztabaidatu eta onartu dezaten. Barrikabason eraiki diren etxeak mantendu eta gainontzeko eremuan etxe gehiago egite galaraziko duen proposamena eramango dugu plenora eta espero dugu gainontzeko taldeek proposamen hori babestea.
 

Barrikako EAJri, beraz, leialtasunaz jokatzeko eta arduragabekeria alde batera uzteko eskatzen diogu. Bertan bizi diren auzokideak euren etxebizitza galtzeko arriskuan ez dezala jarri.
 

Bizkaiko Foru Aldundiari, berriz, hasieratik Barrikabason egindako hanka sartzea onartu dezala eta ez dezala oztopo gehiagorik jarri alde guztien arteko adostasuna lortzeko bidean eskatu nahi diogu.
 

Bizkaiko Batzar Nagusietan orain gutxi entzun ditugu Foru Aldundiko zenbait ordezkarien hitzak Barrikabasoko auziaren inguruan. Barrikako Udalak onartzen duena errespetatuko duela ziurtatu zuen Unai Rementeria lehendakaritza diputatuak orain aste batzuk. Aldundiak Udalen autonomiaren aldeko jarrera duela eta Barrikak onartzen duena errespetatuko duela Barrikabasoko etxebizitzen aferan.

EH Bildutik, ordea, jakin dugu Aldundia kontrako jarrera izaten ari dela. Barrikan zuzenean esku hartu du eta herrian alde desberdinen artean lortu den adostasuna zapuzteko arriskuan jarri du, Barrikabasoko etxebizitzen jabeen artean  eremu hori urbanizatzea posible dela zabalduz.
 

EH Bildutik Foru Aldundiari eskatzen diogu Batzar Nagusietan esandako hitzak orain ez ditzala jan eta errespetatu dezala Barrikan auziko alde desberdinen artean lortu den akordioa. Gainera, hori da Barrikabasoko etxebizitzen egoerari irtenbide ziurra emateko gai den proposamen bakarra. Hau da, eraikita dauden etxeak mantendu eta gainontzeko eremua lehengoratzea. Proposamen horrek ados jarri ditu auzokideak, Txipio Bai eta Udaleko taldeak. Aldiz, Aldundiak Barrikako eremu horretan eraikitzeko asmoekin aurrera jarraitu nahiko balu, segurtasun juridikorik gabeko egoera baten aurrean izango ginateke berriz eta etorkizun hurbil batean etxebizitza guztiak botatzera behartua ikusi daiteke Udala. Horrez gain, enpresa nahiz familiei kalte ordainak emateko arriskua izango luke bere gain.
 

Zer gertatuko litzateke orduan? Aldundiak kalte ordainak ordaintzera arriskatuko da, proiektuarekin aurrera jarraitu ahal izateko? Kontrako hiru epai jaso ostean bide beretik jarraituko du? Esan beharra dago Lezama Legizamon familiak, hirigintza proiektuaren sustatzaileak, ez duela Udala bakarrik salatu. Aldundia ere salatu du. Zergatik dago beraz, Aldundia proiektu honi bide emateko hain tematuta?
 

Gogoratu dezagun bide batez, Karraspioko hondartza ondoko parkinga eta etxebizitzak geldiarazteko agintzen duen sententzia ezagutu berri dugula. Eta Aldundiak, ebidentzia guztien kontra proiektua gauzatzen saiatu dela. Berriro ere halako hanka sartze tamalgarria errepikatzeko asmotan ikusten dugu Foru Aldundia. Zergatik egin nahi du orduan aurrera?
 

Kontuan izanda Txipio Baik dagoeneko hiru epai irabazi dituela, hiru epaitan Barrikabasoko proiektua legala ez dela berretsi dela, Aldundiari exijitzen diogu gaizki egindakoak onartu eta proiektu bertan behera utzi dezala.
 

Aldundiak erabaki okerrak hartu dituela horren nabarmen frogatua gelditu ostean, ez dago ulertzerik legez kanpoko proiektu honekin tematuta jarraitzea. Zein interes du Foru Aldundiak Barrikabasoko etxeetan? Karraspion gertatu bezala, zergatik gauzatu nahi du legearen kontrakoa den proiektua interes pribatu batzuen alde?

Koalizioko batzarkideok azalpenak eskatuko dizkiogu Aldundiari hurrengo osoko bilkuran, proposatzen duenak ez baitu ez hanka ez bururik. Berriz ere, interes orokorraren kalterako eta gutxi batzuen mesederako ari da jokatzen EAJ eta Jose Luis Bilbaoren gobernua.
 

Beraz, esan bezala,EH Bilduk Udal autonomia errespetatzeko exijituko diogu Aldundiari eta Barrikako Udalak HAPO gehiengoz onartzen badu, akordio hori errespetatu dezala. Horixe baita auziari konponbide ziurra emateko bide bakarra.